Ymweliad dychwelyd i gyd-fynd â Tour de France yn Llydaw
7 Gorffennaf 2025
Bydd Maer Aberystwyth yn teithio i Saint-Brieuc yr wythnos hon mewn cam mawr tuag at adfywio perthynas gefeillio hir-sefydlog y dref â’r dref arfordirol yn Llydaw.
Mae’r ymweliad pedwar diwrnod, a gynhelir o ddydd Iau 10 Gorffennaf i ddydd Sul 13 Gorffennaf, yn dilyn ymweliad cynnes ag Aberystwyth yn gynharach eleni gan naw aelod o Gymdeithas Gefeillio Saint-Brieuc. Disgwylir i’r ymweliad dychwelyd adeiladu ar y cysylltiadau hynny ac archwilio cyfleoedd newydd ar gyfer cyfnewid diwylliannol a chymunedol – a hynny i gyd wrth i Saint-Brieuc gynnal y Tour de France, gan ddod â bwrlwm o weithgarwch rhyngwladol a balchder i’r dref.
Mae’r amseru’n arbennig o ystyrlon, gan ddod ychydig ddyddiau ar ôl i Aberystwyth gynnal Pencampwriaethau Beicio Cenedlaethol Lloyds (27–29 Mehefin), a ddenodd gannoedd o feicwyr elitaidd a gwylwyr i’r dref.
Dywedodd y Maer, y Cyng Emlyn Jones: “Mae’n gyd-ddigwyddiad hyfryd bod beicio yn dod â’n dwy dref i’r amlwg o fewn wythnosau i’w gilydd; Mae’n tynnu sylw at un o nifer o ddiddordebau cyffredin rhwng Aberystwyth a Saint-Brieuc, a gobeithiwn y bydd yn helpu i sbarduno cyfnewidiadau newydd rhwng ein cymunedau chwaraeon.”
Bydd y Maer yn cael ei gefnogi gan ei gymar, y cyn-Faer a’r Cyng. Kerry Ferguson, ar yr ymweliad, sy’n cynnwys cyfarfod â Maer Saint Brieuc, Herve Guihard; derbyniad swyddogol, gyda gwesteion o gefeilldref arall Saint Brieuch, Alsdorf yn yr Almaen, hefyd yn bresennol, ac amrywiaeth o ddigwyddiadau diwylliannol eraill fel ymweliad â harbwr y dref. Disgwylir i’r trafodaethau ganolbwyntio ar gysylltiadau dinesig, meithrin cyfnewid diwylliannol, ac ymgysylltiad ieuenctid, wrth ddathlu’r ysbryd cyfeillgarwch newydd rhwng y ddwy dref.
Yn bwysig, bwriad yr ymweliad hefyd yw paratoi’r ffordd ar gyfer cyfnewidiadau gwaelodol rhwng grwpiau cymunedol. Mae trafodaethau eisoes ar y gweill ynghylch partneriaethau posibl rhwng gwahanol glybiau a grwpiau yn y ddwy dref. Mae Clwb Rygbi Aberystwyth, Clwb Bocsio Aberystwyth, a Parti Dawns Aberystwyth eisoes mewn trafodaethau â chlybiau cyfatebol yn Saint Brieuc, a nod yr ymweliad hwn yw cryfhau’r perthnasoedd hyn, gyda’r gobaith o drefnu gemau cyfeillgar, gweithdai a pherfformiadau diwylliannol.
Mae gan Aberystwyth gysylltiadau rhyngwladol hir-sefydlog eraill, gan gynnwys â Kronberg im Taunus, yn yr Almaen. Yr wythnos diwethaf, ymwelodd grŵp o 17 o fyfyrwyr o’r Altkönigschule ag Aberystwyth fel rhan o raglen gyfnewid ysgolion. Yr wythnos hon, mae grŵp mawr o ymwelwyr o Partnerschaftsverein (Cymdeithas Bartneriaeth) Kronberg hefyd yn y dref ar gyfer eu gwyliau blynyddol, gan barhau â thraddodiad hir-sefydlog o gysylltiadau cynnes a gweithgar rhwng y ddwy gymuned.
Mae Aberystwyth a Saint-Brieuc wedi’u gefeillio ers 1973, a Kronberg ers 1997, gyda’r ddwy berthynas yn meithrin cysylltiadau diwylliannol, addysgol a phersonol dros y blynyddoedd. Mae gefeilldrefi eraill, gan gynnwys Yosano yn Japan ac Arklow yng Ngweriniaeth Iwerddon, hefyd wedi gweld adfywiadau dros yr ychydig flynyddoedd diwethaf, gydag ymweliadau gan faer y ddau dref, ac ymweliad ag Yosano i ddathlu 40 mlynedd o gyfeillgarwch a ffurfioli’r gefeillio. Bydd Aberystwyth hefyd yr haf hwn yn croesawu llong dal o Arklow, yn cludo pobl ifanc dros Fôr Iwerddon i gwrdd â phobl ifanc Aberystwyth.
Dywedodd y Cyng. Emlyn Jones, o ran gefeillio yn gyffredinol; “Mae’r Cyngor Tref yn falch o ganolbwyntio nid yn unig ar y materion hanfodol yn y dref, ond ar ehangu’r perthnasoedd gefeillio sy’n ychwanegu cymaint at y tapestri o ddiwylliant, chwaraeon, cerddoriaeth a bywyd yma yn Aberystwyth. Mae ein partneriaethau gefeillio nid yn unig yn rhoi cyfle inni adeiladu cysylltiadau rhyngwladol, ond maent yn denu pobl i Aberystwyth, ac o Aberystwyth i’n gefeilldrefi. Ochr yn ochr â’r cysylltiadau diwylliannol, ieithyddol, cerddorol, chwaraeon, a chysylltiadau eraill y mae’n galluogi pawb, yn enwedig pobl ifanc, i’w meithrin, mae gefeillio yn dangos ein hymroddiad i hanes Aberystwyth fel tref rhyngwladol a’r cyfoeth y mae hyn yn ei ychwanegu at bawb sy’n gysylltiedig.”
Am fwy o wybodaeth neu i fynegi diddordeb cysylltwch â’r Cyngor Tref ar cyngor@aberystwyth.gov.uk